Anum ka mga gina-alegar katapo sang New Pepole’s Army patay sa encounter sa Kabankalan City sang kagab-i. Apat sa anum mga lalaki kag duha ang babaye. Pphilippine Army naga panindugan nga tanan sila katapo sang NPA.
Nagdinalagan ang mga pumuluyo sang makita nga napapanaug na ang bangkay sang mga gina siling katapo sang NPA kaina sang aga sa Barangay Tabugon sa Kabankalan City. Luyag nila mahibaluan kun may kilala sila sa mga napatay. Anum tanan ka mga gina patihan katapo sang NPA ang napatay sa encounter nga nag luntad mga las otso sang kagab-i sa Sitio lubi. Suno sa kay Lt. Col J-Jay Javines, spokesperson sang 3rd Infantry Division sang Philippine Army nakabaton sang impormasyon ang katapo sang 47th IB nga tropa sang army nga may naga pangilkil nga mga NPA sa amo nga lugar gani gin respondehan nila.
Kag didto na natabo ang bayluhanay sang lupok sa sulod sang dies minutos nga nag resulta sa kamatayon sang anum tanan ka mga NPA. Sanday Alejo delos Reyes, alias Peter/Bravo, squad leader sang squad 2 sang sangay yunit propaganda platoon 3; Marjon Alvior, alias Kenneth, vice squad leader sang squad 2, SYP platoon 3; Bobby Pedro, alias Recoy, vice squad leader sang squad 3 sang amo man nga platoon; Mario Fajardo Mullon, alias Reco/Goring, medic sang squad 1 ; Melissa dela Pena, alias Diane, misis ni alias Bravo kag isa ang wala pa makilala.
Pero kaina sang aga may nagkilala sa isa sa mga bangkay nga amo si Robin Gaitan kag suno sa iya misis siya ang tricycle driver lamang kag posible nasal-an lang bangud pasahero niya ang mga armado. Pero naga panindugan ang Philippine Army nga ang anum ka mga napatay ang katapo tanan sang NPA.
May apat ka mga 45 cal pistol, isa ka 38 caliber revolver kag hand grenade nga nakuha sa mga biktima. Napuno man sang igo sang bala ang tricycle. Kahapon sang aga ginpatigayon ang walk for peace sa Kabankalan para ipanawagan ang kalinong kag pagkagab-i natabo ang encounter.