Anum ka mga barangay sa Bacolod sarang maka-benepisyo sa dugang nga 3 million liters a day (MLD) nga supply halin sa Matab-ang River.
Gin-activate na sang Baciwa-PrimeWater ang Matab-ang Water Treatment Plant sa Barangay Granada sa Bacolod. Gani sugod na mabatyagan ang dugang nga 3 million liters a day nga supply sang tubig sa Barangay 27, 28, 30, Estefania, Villamonte kag Mandalagan. Sandig sa management sang water distribution utility, kapin sa 5,000 ka household consumers ang sarang makabenepisyo sa dugang nga water supply. Ginapaabot nila nga sa dalayon magsaka sa 6MLD ang sarang nga madeliver nga supply sang pasilidad sa madasun nga binulan. Ginpahayag ni Mayor Albee Benitez nga paagi sa dugang nga supply mas magasaka pa ang supply sa masobra 80MLD matapos man ang pagtupa sang ulan halin sang nagligad nga inadlaw.