Ginbawian sang kabuhi ang 6-anyos nga bata nga babaye matapos maiguan sang bala gikan sa pusil sang iya amay sa nabukid nga bahin sang Hacienda Paul Chang, Estado sa Barangay 10 Victorias City.
Nakaangkon ang biktima sang igo sang bala sa nawala nga guya.
Gindeklarar siya nga dead on arrival sa Abelardo and Remedios Bantug Memorial Hospital.
Nag-gwa sa imbestigasyon sang kapulisan nga matapos mang-uling, nag-ihaw sang baboy ang amay sang biktima kag nag-inom-inom upod ang iya mga kaupdanan sa ila temporaryo nga puluy-an.
Ang biktima ang yara sa tupad sang iya amay sa papag, samtang ang duha niya ka mga manghod ang nagahampang.
Suno sa mga saksi, gulpi lang naglupok ang pusil sang amay kag sila ang nagpuag. Nakibot na lamang sila sang makita nga may igo sang bala ang bata.
Gindakup sang Victorias City Police ang amay sang biktima.
Ginahulat na lang karon sang kapulisan ang iloy sang bata kun siya ang magapasaka sang kaso nga reckless imprudence resulting in homicide, batuk sa amay.