May 55 ka mga pasahero nga nag-abot kahapon kag subong nga adlaw, Biernes, sa Bacolod-Silay airport ang nangin reactive sa rapid antigen test nga ginpatuman sang probinsya.
Suno kay provincial administrator Rayfrando Diaz ini sila ang gindala sa healing center sa Silay City para sa isolation.
Ang 55 suno sa iya ang gikan sa nagkalain lain nga mga flights sang Hwebes, tubtob as of 2pm sang Biernes. 14 ka adlaw ang isolation, pero, sa mga fully vaccinated napulo ka adlaw, suno kay Diaz.
Sa Domingo pa maga sugod ang pag patuman sang executive order sang gobernador nga magahinyo sang negative RT – PCR test result sa mga magapaduong sa Negros Occidental nga gikan sa mga lugar nga yara sa idalom sang alert level 3.
Gani tubtob nga mapatuman ini, rapid antigen testing anay ang ginapatuman sang probinsya bilang mapabakod ang tikang kontra Covid – 19. May 94 percent accuracy ang rapid antigen test suno kay Diaz.
Wala labot diri, ginpatuman man sang probinsya ang one flight per airline, per day na lamang. Ang mga sea vessels naman tugutan sang 50 percent sa passenger capacity sini.