Isa ka misa kag pag martsa sa dalanon ang patigayunon sa Bacolod City sa pag dumdom sang ika 40 nga anibersaryo sang Edsa People Power Revolution sa Pebrero 25.
Sa press conference nga gin patigayon kaina sang aga sang grupo nga Tama Na Negros, ONE-C, C3 kag CGGB ginsiling ni Fr Arman Onion, nga indi mag nubo sa 5,000 ang ila nga gina paabot nga maga buylog sa padayon nga panawagan kontra korapsyon kag sa kapigaduhon.
Las 12:30 sang udto sa Miyerkules, maga sugod ang hilikuton sa isa ka misa sa steps sang Provincial Capitol. Ini ang pamununuan mismo ni Bishop Patricio Buzon.
Pagkatapos sini sila ang maga martsa padulong sa public plaza kag maga tipon sa replica kun sa diin may yara sang programa nga iga sakdag.
Nalakip sa mga eskwelahan suno kay Onion nga maga pakig bahin amo ang University of St La Salle, Colegio San Agustin – Bacolod, St Scholastica’s Academy Bacolod kag University of Negros Occidental – Recoletos.
Suno kay Onion ang mga wala pa maka desisyon ang gina haylo nila nga mag buylog sa pag singgitan kontra korapsyon.
Suno kay Fr Mao Buenafe papel sang simbahan nga mag duso sang liwat nga pag balik sang kainit sang gugma para sa pungsod sa tagsa ka pumuluyo.
Indi dapat pag kalipatan suno sa ila ang pag pakibato para sa demokrasya kag hustisya.*
[sibwp_form id=1]