Maid-id nga ginamonitor kag ginapatuman sang pamunuan sang Department of Education ang health protocol sa pagbalik sang limited face to face classes sa Alangilan National High School sa Barangay Alangilan.
Nagalaum ang DepEd upod man sa katapo sang Emergency Operations Center sa kadalag-an sang pilot limited face to face classes sa amo nga buluthuan agud madugangan pa ang pagbalik sang face to face classes sa pila pa ka mga eskwelahan sa siudad.
Nalakip sa lima pa ka mga eskwelahan nga ginahanda para sa posible pagbalik sang limited face to face classes ang Don Alberto Arceo Elementary School kag Rafael Alunan Elementary School sa Barangay Alangilan. Fr. Gratian Murray Integrated School, Asuncion Lizares Elementary School kag Vista Alegre Granada Relocation Elementary School sa Barangay Granada.
Suno kay Councilor Renecito Novero, samtang wala pa man sang plano ang DepEd para sa full implementation sang face o face classes karon nga school year, magapabilin man anay ang iban nga mga school facilities sa Bacolod nga ginhimu bilang mga temporaryo nga quarantine kag isolation center karon nga pandemic.