5 ka mga ospital sa probinsya ang may structural damage sang mag-igo ang bagyo Odette. Padayon karon ang assessment kag ang ospital sa Sipalay amo ang natam-an.
Suno kay provincial administrator Rayfrando Diaz, maga padulong sa ospital sa Sipalay ang adjuster sang Government Service Insurance System para sa assessment sang halit sa ospital. May structural damage man sa ospital sa Hinoba-an.
Pero suno kay Diaz, daan naman gid ang amo nga edepisyo. Ang ospital sa Himamaylan may kahalitan man.
Wala labot sini, naga gamit ang ospital karon sang generator set bangud sang indi estable nga supply sang kuryente sa lugar nga naga butang sa alang-alang ukon maka guba sa mga hospital equipment.
Ang Valladolid District Hospital kag Teresita Lopez Jalandoni Provincial Hospital sa Silay City may mga structural damage man.
Pero, padayon ang operation sang mga natungdan nga ospital suno kay Diaz. Ginbaha man ang ospital sa Kabankalan pero ini ang natinluan na gikan sa tubig baha.
Padayon pa ang pag abot sang mga report bahin sa kahalitan sang bagyo Odette. Nalakip man diri ang halit sa roofing sang grandstand sang Paglaum Sports Complex.
Suno kay Diaz nag hinyo na sila sang gilayon nga pag demolish sang mga bahin nga tuman nagkalaguba.