Sabado sang ginfile sa Bacolod Presecutor’s Office ang reklamo nga pagsupak sa RA 8042 ukon ang the Migrant Workers and Overseas Filipinos Act as amended by RA 10022, kag pagsupak sa RA 10175 ukon ang Cybercrime Prevention Act batuk kanday Sandy Ginete Agena, Maricar Mercader Bangcale, Arlene Espinosa Alonday, Richard Sumicad Hiponia kag Ma. Teres Maningo Aragon.
Pero ila nga ginpakamaayo nga mag avail sang preliminary investigation. Angut diri sila ang ginhatagang sang prosecutor sang napulo ka adlaw nga mag file sang ila nga counter affidavit kag countervailing statement.
Ang lima ang gindakop sa isa ka entrapment operation sang National Bureau of Investigation, Biyernes sang hapon matapos nga ginreklamo sang illegal recruitment.
Suno kay NBI Bacolod chief, Renoir Baldovino, gina siling man nga isa sila ka consultancy firm, ugaling base sa ila nga social media post naga tanyag sila sang job opportunities sa pungsod Japan kag Australia kag kasubong nga sila ang naga pang recruit.
Indi na luyag pa sang isa sa apat ka mga tagreklamo nga ihambal pa ang iya nga ngalan, pero nagbayad siya sang 50,000 pesos nga placement fee, kag isa ka libo pa gid para sa mga documents, sa handom nga maka trabaho sa Japan. Matapos nga nagduda bangud sang namutikan nga delay iya gin-usisa sa Philippine Overseas Employment Agency ang KAS-A & SMV Management Consultancy kag siya ang gin abisuhan sang ahensya nga mag back-out.
Suno kay Baldovino, magluwas sa apat ka mga complainants may isa pa gid nga magadugang. Gintinguhaan sang Digicast Negros nga kuhaan sang bahin ang lima ka mga ginreklamo, ugaling sila ang nag pamalibad na sa paghatag sang ila nga pahayag.