Grave misconduct ang gin-file batuk sa lima ka mga empleyado sang Office of the Provincial Agricutlrurist. Sila ang ginpaidalom man sa 60-day preventive suspension.
Suno kay Provincial Legal Officer, Alberto Nellas, Jr. natapos na ang deliberation nila ni Governor Eguenio Jose Lacson kag sang Martes tigayon na naserbe ang formal charges kag suspension order batuk kanday Engineer Jimbo Garsula nga isa ka division head, Ramelo Letran, Engineer III, German Abihay, Engineer III, Rezin Palacios, Engineer I, kag Maria Luisa Abaño nga Project Development Assistant.
Sila ang ginreklamo sang mis-use sang government vehicle matapos nga gin dul-ong sa Victorias City sadtong Hulyo 15 para sa pagsinapol paagi sa Capitol Cab Service. Nagdangat na las cinco sang hapon, wala sila sa gihapon makabalik sa nagahulat nga driver sandig sa reklamo. Pasado las 8 sang gab-I, nakit-an sila sa isa ka kalan-an kag gina alegar naga inom-inom.
Sa Biyernes suno kay Nellas gina paabot ang sabat sang lima kun luyag nila nga mag padala na lamang sang position paper ukon mag paidalom sa hearing. Sa sulod sang 60 ka adlaw gina paabot nga ma desisyunan ang kaso.
“Upon receipt wala sila dayon gina pa report”, suno kay Nellas.
Suno kay Nellas, 2 counts sang grave misconduct ang na file batuk kay Garsula matapos nga nag buya ini sang malain nga tinaga batuk sa in-charge sang Capitol Cab Service.
Ang preventive suspension naga tuyo nga indi ma impluwensyahan sang lima ang gina patigayon nga pag pangusisa sa ila. Wala man sang batunon nga sweldo sa amo nga tion suno kay Nellas. Sa lima si Garsula lamang ang nalambot sang Digicast Negros. Iya ginsiling nga sya ang magahatag sang pahayag sa nagakaigo nga tion.