Matapos mag positibo sa iligal nga droga ang pito ka mga traffic enforcers, lima na naman ka mga Disaster Risk Reduction Management Office personnel sang Silay City nagpositibo sa surprise drug test.
Lima tanan ka mga personnel sang Silay City DRRMO ang nag positibo sa ginpatigayon nga surprise drug test sa 126 ka mga personnel sang siudad sang Biyernes.
Mismo si Mayor Joedith Gallego ang nagmando sang drug testing nga gin patigayon sang Silay City PNP kag Philippine Drug Enforcement Agency Region 6.
Suno sa alkalde, isa ka regular employee kag apat ka mga casual employee ang nagpositibo.
Indi na pag i-renew sang siudad ang kontrata sang apat ka mga casual samtang nag-resign na ang regular employee.
Sang nagligad lamang nga semana, pito ka mga traffic enforcers sang siudad ang nagpositibo sa drug testing samtang duha ka job order worker sang Silay City nga nagatrabaho bilang watchman sa isa ka eskwelahan ang nakuhaan sang iligal nga droga sa drug buy-bust operation.