Nagkalain-lain nga mga intensity ang nabatyagan sa mga banwa kag siudad sang Negros Occidental kasunod sang pag igo sang 6.9 magnitude nga linog Martes sang gab-i.
Sa report sang Provincial Disaster Risk Reduction Management Council, makusog nga nabatyagan ang pagtay-og sa Murcia nga nag report sang intensity VI.
Intensity V naman sa Hinigaran, Moises Padilla, San Carlos City, San Enrique, Toboso, Isabela, Calatrava, Silay City, Talisay City, Victorias City, Escalante City EB Magalona kag Bacolod City.
Intensity IV naman sa Cauayan, Pontevedra, Sagay City, Valladolid, Pulupandan, Manapla, La Castellana, Cadiz City, Bago City, Sipalay City, Himamaylan City, Ilog, pika ka bahin sang Binalbagan, La Carlota City, Don Salvador Benedicto kag Kabankalan City.
27 ka mga LGU ang nag-suspend sang face to face classes kag anum naman ang nag suspend sang trabaho lakip na diri ang Negros Occidental.
Tagsa ka LGU ang nagpatuman man sang structural integrity assessment para mapasiguro nga safe ang mga buildings antes pa man mabalikan sang mga trabahante.
Sa Provincial Capitol suno kay Negros Occidental Governor Eugenio Jose Lacson, kagab-i pa lang tigayon na nga na check ang mga buildings pero para sa peace of mind sang mga government employees nag desisyon siya nga iga suspend subong nga adlaw ang trabaho kag padayunon ang pag review sang stability sang buidlings.
May mga minor cracks nga nakit-an sa 4th kag 5th floor sang Cadiz District Hospital rason nga gin-evacuate anay ang mga pasyente pending sang clearance.
Suno kay Irene Bel Plotena, ang pamuno sa PDRRMO may mga nagkalabuka nga glass windows sa 3rd tubtob 5th floor.
“The main building is structurally sound. The ground floor through the second floor are safe for occupancy; however, the third through fifth floors are not yet suitable for use due to broken glass windows and frames”, suno kay Plotena.
Suno kay Mayor Salvador Escalante Jr sang Cadiz nagmando man siya sang pag pa check sa iban pa gid nga mga buildings lakip na mga eskwelahan.
Samtang, ang team gikan sa PDRRMO kag Provincial Engineer’s Office ang nag patuman sang structural integrity assessment sa mga buildings sang gobyerno probinsyal kag as of press time naga padayon ang inspection lakip na ang pag consolidate sang report.
Nagapalab-ot naman si Governor Lacson sang pag pakig unong sa mga pamilya nga namatyan sang mga himata bangud sang makusog nga linog sa Cebu.
Wala ginlauman ang kasubong nga kadamuon sang nagkalamatay kag halit suno kay Lacson.