Humalin pa sang kaagahon nga ginakaayo sang amay nga si Jonie Daulong ang ila naguba nga balay sa Barangay Estefania sa Bacolod.
Istorya ni Daulong, diutayan na lang siya mapilpilan sang puno sang doldol nga natumba sa ila puluy-an sang magwaswas ang mabaskog nga hangin tuga sang Bagyo Odette.
Maayo na lang suno sa iya nga wala maigo ang iya mag-iloy nga nagakatulog sang matabo ang insidente pasado las onse kagab-i.
Nag-agum naman siya sang magagmay nga pilas sa lawas kag tuhod.
“Ang ginsiguro ko lang ang akon mga kabataan nga indi maipit,” siling pa ni Daulong.
Ang pamilya ni Daulong ang temporaryo nga nagpaligad sang gab-i sa sulod sang panel van.
Pero kaina sang aga sila ang nakabalhin na sa puluy-an sang iya utod.
Magluwas kay Daulong, may pila pa ka mga pamilya ang nawad-an sang balay epekto sang halit sang bagyo.
Naglab-ot man sa 4,986 ang gin-evacuate nga indibidwal sa mga gintalana nga evacuation center sang siudad.
Suno kay Dr. Ana Maria Laarni Pornan,kadam-an sa mga pamilya ang nagapabilin pa sa mga evacuation center samtang wala pa makaayo ang ila puluy-an kag wala pa nakabalik ang supply sang kuryente.
Nakapalab-ot na sang ayuda ang siudad pinaagi sa Department of Social Services and Development sa mga naapektuhan sang bagyo.
May mga commercial establishment man nga nagkalaguba, mga atop nga ginpalid sang hangin kag mga kudal nga nagkalawas-ag bangud sang maximum sustained wind sang bagyo nga naglab-ot sa 185 kilometer per hour.
Humalin kaina indi pa man maagyan ang pila ka mga dalan bangud sang nagkalatumba nga puno sang kahoy.
Kabahin diri ang sa likod sang Bacolod City Government Center, Magsaysay Street sa Barangay Villamonte kag North Capitol Road sa Provincial Capitol.
Padayon ang ginahimu nga clearing operation sang katapo sang City Disaster Risk Reduction Management Office kag rescue volunteer group.
Nagpasalig naman ang Central Negros Electric Cooperative nga kun makaayo na mga nagkalaguba nga linya sang kuryente ma amat amat naman balik ang supply sang kuryente.