45-day experimental parking sa Lacson Street ipatuman sang BTAO bisan wala pa sang aproval halin sa konseho.
Sa session sang konseho ginpahayag ni Councilor Al Victor Espino, pamuno sang Committee on Transportation and Traffic nga kinahanglan mag-agi anay sa Sangguniang Panlungsod ang ginpatuman nga 45-day experimental parking sang mga salakyan sa Lacson Street.
Gani indi pwede ini mapatuman sang Bacolod Traffic Authority Office sandig sa rekomendasyon sang Bacolod Traffic Authority Council.
Si Mayor Albee Benitez ang nagpabor nga tugutan ang pag park sang mga salakyan kada las siete sang gab-i asta las singko sang kaagahon kun Lunes asta Biyernes.
Kag kun weekend libre na ang parking santo sa hinyo sang mga tagdumalahan sang commercial establishments ilabi na mga restaurant sa lugar.
Ginsiling ni BTAO deputy Jose Antonio Robello nga sa pihak sang pahayag ni Espino, ipatuman nila ang experiment kag tugutan ang pag park sang mga salakyan sa gintalana nga oras.
Pero ginklaro niya nga sa gihapon ginadumilian ang pagpark sa taytay, malapit sa mga fire hydrants kag intersections.