43 ka mga barangay sa 18 ka mga banwa kag siudad sa probinsya ang gin-deklara nga insurgency free sini nga 2024.
430 milyones pesos sa kabilugan ang balor sang proyekto nga ila pagabatunon sa 2025.
Sa idalom sang Support to Barangay Development Program sang Provincial Task Force to End Local Communist Armed Conflict, kasunod sang ila nga insurgency free declaration, ini nga mga barangay ang magabaton sang tig 10 milyones pesos para sa mga proyekto sa barangay nga ila gin-propose.
Ini nga mga barangay ang gikan sa Binalbagan, Calatrava, Candoni, Cauayan, EB Magalona, Hinigaran, Hinoba-an, Isabela, La Carlota City, Moises Padilla, Murcia, Sagay, Salvador Benedicto, San Carlos City, Silay City, Sipalay City, Talisay City kag Valladolid.
Nagalakip ang ila nga mga proposed projects sang farm to market roads, school building, electrification, health center kag mga non-infra projects.
Gina panginbulahan ni Governor Eugenio Jose Lacson ang ini nga mga barangay.
“Originally this is 20 million. It has gone down to 2.5 million. Next year it’s up to 10 million because of better collection by the national government. Our National Tax Allotment has also increased by 18 percent”, suno kay Lacson.
Paathag sang pamuno sang Department of the Interior and Local Government sa Negros Occidental, Teodora Sumagaysay, ang ini nga mga barangay, antes gindeklara insurgency free ang nagpaidalom sa retooled community support program kag validation sang militar.
Sang 2023 suno kay Sumagaysay, tatlo lamang ka mga barangay gikan sa Cauayan ang tigayon nadeklara insurgency free kag ang pondo nga ila nabaton sini nga 2024 sa idalom sang SBDP ang tig 2.5 million pesos lamang.
20 milyones pesos sadto anay ang pondo nga gina-release sa idalom sang amo nga program pero nanaog ini sa 4million, nangin 6 million, 2.5 million kag sa 2025 ginapaabot 10million.