Pamuno sang BCPO, wala nagapati nga pulis amo ang nag tira sa grupo nga Aki Cuadra robbery holdup group nga nag resulta sa kamatayon sang lider sang grupo kag tatlo ka miyembro. Onsehanay amo gina tan-aw karon sang PNP.
Padayon karon ang imbestigasyon sang Bacolod City Police Office may kaangtanan sa pag abduct kag pag patay sa miyembro sang grupo nga Aki cCuadra robbery group lakip na ang lider mismo nga si Aki Cuadra nga nag palagyo pa pero tigayon man napatay sang armado nga grupo.
Pasado las onse sang Biyernes sang gab-i gin sulod sanday Cuadra kag tatlo ka upod sa ila gina tiniran nga balay sa villa homes sa Barangay Vista Alegre sa BBacolod.
Sabado sang aga nasapwan nga patay ang leader nga si Arnold Cuadra ukon si aki sa kilid sang suba sa bahin sang Villa Angela Subdivision sa Barangay Villamonte.
Suno kay Captain Elmer Bonilla, wala nalakip si cuadra sa gin abduct bangud sa nakapalgyo ini apang siya ang gin lagas sang mga Armado kag didto na naabtan kag gin tiro sa kilid sang suba.
Ang tatlo pa ka mga kaupod ni Cuadra nga gin abduct ang nasapwan man nga patay.
Pasado la una sang kaagahon sang Sabado nasapwan ang bangkay ni Rene Boy Dacillo sa Barangay Atipuluan sa siyudad sang Bago.
Sa Barangay Blumentritt naman sa banwa sang Murcia nasapwan pasado las sais sang aga ang bangkay sang mag himata nga miyembro sang grupo nga sanday Jhundelle Rafols kag Leonil Rafols nga pareho man nga napatay sa pag paniro.
Suno kay Bonilla, may kabudlayan sila sa karon sa pag identify sa mga suspek bangud sa waay man sang mga CCTV sa area. Pero si Bonilla pati na si BCPO director Col Thomas Joseph Martir ang naga pati nga onsehanay sa ila mismo amo ang motibo sa pag patay sanday Cuadra kag ila nga mga ka grupo amo man ang suspek.
Wala man naga pati si Martir nga pulis ukon grupo sang pulis amo ang may kahimuan sang krimen bisan pa madugay na nga gina pangita man si Cuadra bangud sang nagkalain lain nga kaso lakip na iligal nga droga.