Apat ka mga engineer kag isa ka staff sang Office of the Provincial Agriculturist ang gin papanaugan sang show cause order angut sa gina alegar ila nga pag mis-use sang salakyan sang gobyerno probinsyal.
Hulyo 21 sang ginpangayuan sang paathag ang lima ka gikan OPA kag ginhatagan sang lima ka adlaw para maka submit sang ila nga sabat.
Suno kay Provincial Legal Officer Alberto Nellas, Jr., Hulyo 15 sang gindul-ong paagi sa Capitol Cab, ang lima ka taga OPA nga gina pamunuan sang isa ka division head sa Victorias City Hall para sa isa ka meeting.
Ugaling naglapaw na sa oras nga yara sa ila travel order wala pa sa gihapon sila tigayon naka balik sa Bacolod. Sang ginpangita na natukiban nga yadto sila sa isa ka kalan-an. Gina alegar nga ang lima ang naabtan naga inom.
Gin-abisuhan na lamang ang driver nga naga hulat sa lima nga magbiya. Sa show cause order, naka saad man nga gintawgan pa gid sang isa sa lima ang in-charge sang capitol cab kag ginbuy-an sang malain nga tinaga. May incident report nga na file angut diri. Gina hulat pa sa karon ang sabat nila nga lima sa show cause order nga gin papanaog.
“Nagtawag ang driver, I think 5 o’clock na, tapos wala sila gihapon kitaon. Tapos pag las 8 na sirad-an na sila sa City Hall. Gin-verify nila ang location sa OPA mismo, ang ina na staff members ara na daw sa I think sa ilimnan at 8:30pm. Wala gid sila kabalik sa Bacolod. These are senior members of the OPA. May ara isa ka division head, tapos may ara tatlo ka engineers tapos isa ka staff”, suno kay Nellas.