4 tanan ka mga eskwelahan sa Bacolod City ang ginpaidalom sa disinfection bangud sang pagsaka sang kaso sang hand, foot and mouth disease.
Dungan sa semestral break sang mga estudyante, gin-disinfect sang katapo sang Disaster Risk Reduction Management Office ang Estefania Elementary School sa Barangay Estefania.
Suno kay MJ Alipala, school nurse sang eskwelahan, Enero sang nagsugod ang una nga kaso sang HFMD sa buluthuan tubtob nga naglab-ot ini sa 17.
Ang barangay council ang nagpadala na sang mga habon kag alcohol nga gamiton sa pagbalik eskwela sang mga estudyante sa Lunes.
Magluwas sa barangay Estefania, nagpatigayon man sang disfection ang DRRMOupod sa DepEd kag City Health Office sa pila ka mga classroom sa Rafael Alunan Elementary School sa Barangay Alangilan, Corazon Locsin Montelibano Elementary School sa Barangay Villamonte kag Mabini Elementary School.
Sa record sang CHO, nagalab-ot na sa 28 cases ang HFMD kun sa diin kalabanan sa mga nalatnan naga-edad isa tubtob lima ka tuig.
Ginsiling man ni DepEd – Bacolod program supervisor Lila Arro, nga humalin sang nagligad nga Disyembre may mga klase na sa pila ka mga eskwelahan sa siudad nga na-suspend tungod sang HFMD cases.
Nagapanugyan siya karon sa mga ginikanan nga kun may sintomas sang HFMD ang ila mga kabataan indi na ini pagpakadtuon pa sa eskwelahan, i-isolate ang bata kag kun mahimu i-report ini sa barangay ukon sa natungdan nga ahensya agud matagaan gilayon sang atensyon.