Tatlo ka mga balay ang nasunog, samtang isa ka residente ang nakaangkon sang madamo nga paso sa sunog nga nagluntad sa Sitio Sibucao, Purok Rosas Pandan sa Barangay Banago, sa Bacolod, Miyerkules sang hapon.
Nagbinuligay paagi sa pagpasahay sang balde nga may unod nga tubig ang mga pumuluyo agud nga matapna ang kalayo.
Base sa report sang Bacolod Bureau of Fire Protection, nadulaan sang balay sa nasambit nga sunog ang 10 ka mga indibidwal.
Ginabulubanta P30,000 ang kahalitan sang sunog.
Kaina pasado las 3 sang Hwebes sang kaagahon, ginlamon sang kalayo ang bodega sang VMA Global College nga nahamtang sa Earl Carol Street, Barangay Sum-ag sa syudad sang Bacolod.
Pagkaligad sang anum ka oras, isa naman ka fire call ang ginrespondehan sang mga bombero sa Purok Mahigugma-on, Barangay Tangub sa syudad sang Bacolod.
Nasunog ang bahin sang ancestral house sang anay kagawad sang Barangay Tangub.
Padayon pa ang imbestigasyon sang Bacolod BFP agud mahibaluan ang gintunaan sang tatlo ka mga sunog sa Banago, Sum-ag kag Tangub.