Nagsapol si Bacolod City Mayor Greg Gasataya sa pamunuan sang Bacolod City Water District kag tagdumalahan sang PrimeWater Corporation bilang pagpanghanda sa ginapaabot nga super El Niño.
Gin-report sang BACIWA sa alkalde nga nagdangat sa 37 million liters per day ang non-revenue water sa siudad ukon mga usik nga tubig bangud sa mga pipe leakages kag iban pa nga mga rason.
Suno kay Gasataya, kun tigayon na nga makaayo sang BACIWA ang mga na identify nga pipe leakages, sarang lamang ini maka-save sang 7 million liters per day.
Sa karun yara sa 93 million liters per day ang suplay sang tubig nga gina deliver sang BACIWA sa mga konsumedor.
Dugang ni Gasataya, nagsaad naman ang bulk water supplier sang BACIWA nga magadugang sila sang 20 million liters per day sa suplay agud mapasaka ang available nga suplay sa siudad kada adlaw.
May lima ka mga areas sa Bacolod nga may mga kaugalingon nga deep wells ang ginaduso man sa BACIWA nga makuhaan sang dugang nga suplay sang tubig. 5 to 7 million liters per day ang sarang nga masuplay sini para sa BACIWA.
Ginkasugtan man sang BACIWA kag sang LGU ang pagpatuman sang pila ka mga tikang agud magkinot sa tubig, lakip na ang pagpauntat anay sang fountain sa plaza, bangud naga-usik ini sang tubig.
Wala pa ginbaton sang BACIWA ang pagtake-over sang Hiraya Water Corporation bangud may mga dokumento pa ini nga wala ma comply suno kay Gasataya.
[sibwp_form id=1]