Bilang pagpanghanda sang Land Transportation Office Negros Island Region sa ginapaabot nga pagdagsa sang pasahero sa mga terminal kag dalanon sa tigkalalag, padayon nga ginapatuman sang ahensya ang Oplan Biyaheng Ayos kun sa diin ila gina-inspect ang mga salakyan nga nagabyahe.
Ginsiling ni Jeck Conlu, pamuno sang LTO-NIR, humalin san Biyernes may 37 na ka mga salakyan ang ila nadakpan bangud sa nagkalain-lain nga bayolasyon.
Suno sa iya, kinahanglan nga road worthy ang salakyan antes ini magbyahe agud masiguro nga wala sang mga aksidente nga matabo sa dalan sa tion sang tigkalalag.
Dugang pa niya, may pila na ka mga salakyan ang ila nadakop bangud halos pudpod na ang guma, kag indi na road worthy.
Bilang kabahin man sang Oplan Biyaheng Ayos sa Undas 2026, may mga personnel nga igahamtang ang LTO sa mga terminal agud may palapitan ang mga pasahero kun may yara sila sang mga reklamo.
Suno kay Conlu, ginapaabot nga magdamo na ang pasahero sa weekend.
Sa karun may masobra na sa 500 ka mga salakyan ang na inspect sang LTO kag 37 diri ang may mga bayolasyon. Nagpahanumdom man ang ahensya sa mga motorista nga i-renew ang mga driver’s license kag registration sang ila mga motorsiklo kag magsuksok gid sang helmet kun mag biyahe.
[sibwp_form id=1]