Ginsiling ni Kabankalan City Mayor Benjie Miranda nga may 35 ka mga balay ang naguba bangud sang buhawi nga nag-igo sa Barangay Bantayan.
Mga las 3, Domingo sang hapon, sang nagbubo ang mabaskog nga ulan kag hangin. Pagkaligad ang pila ka minutos, makit-an ang mga nagkalakakas kag naglinupad nga atop sang balay, pati ang mga nagkalatumba kag nagkalagabot nga mga kahoy.
Suno kay Miranda, may ka-apat na ka beses nga gin-igo sang buhawi ang lugar, sang mga nagliligad nga tinuig.
Ginhatagan ang mga apektado nga pumuluyo sang food packs kag cash assistance, bilang inisyal nga personal nga bulig gikan sa alkalde kag bise-alkalde sang siudad.
Sa karon, padayon pa ang pag-validate sang mga biktima sang buhawi agud mahatagan sang dugang nga bulig gikan sa Department of Social Welfare and Development.
Temporaryo nga nagapuyo sa ila mga tupad balay kag himata ang mga pamilya nga nadulaan sang balay bangud sang buhawi.
“Wala pa ang (bulig gikan) sa DSWD, CSWD, sa DRRM kay gina-assess pa pero akon ya, may personal na kami anay ni vice nga amon anay bulig nga gindul-ong sa ila para nga at least may inisyal sila nga magamit while nga gina-validate (ukon) gina-assess pa sang CSWD kag sang DRRM”, suno kay Miranda.
