Sang nagsugod ang Covid 19 pandemic nag inulhot man ang mga illegal structures, mga resort kag kapehan nga natukod kag naga operate sa sulod sang Northern Negros Natural Park.
Suno kay Joan Gerangaya, OIC-Penro Officer kag concurrent Park Superintendent, may masobra na sa 30 ka mga nagapanag iya sang illegal structures ang napadal an sang notice of violation kag tigayon nga napa untat ang construction kag operation sa nasakpan sang NNNP.
Sa pagsaulog sang Northern Negros Natural Park Day sa Gawahon Eco Park sa siudad sang Victorias, nanawagan man ang mga opisyal sang Department of Natural Resources Office sa provincial kag local officials sa pagpabaskog sang tikang agud mapangapinan ang masobra 70,000 hectares nga kagulangan nga nasakpan sang onse ka mga local government unit sa Northern kag Central Negros.
Si 3rd district Congressman Franciso Benitez nagalaum nga sa bulig sang Protected Areas Management Board mahimu nga mapalad pa ang nasakpan sang NNNP kun diin napahamtang ang tatlo mga watershed areas sang probinsya.
Kadungan sang NNNP Day ginpatigayon man ang tree planting activity, trade fair kag iban pa sa Gawahon Eco Park nga amo ang nagapanguna nga atraksyon sa Victorias City.
Ginpahayag naman ni Mayor Javi Benitez ang plano sa pagtukod sang Gawahon Eco Park Development Authority sa tuyo nga mapasanyug pa ang turismo kag ang pag-amlig sa 24 hectares nga kagulangan nga sakop sang NNNP.
2005 sang natukod ang National Integrated Protected Areas System (NIPAS) Act agud maamligan ang kapin 70,000 hectares sang kagulangan nga nasakpan sa Northern kag Central Negros.