Nag binungguanay ang tatlo ka mga salakyan sa national highway sang Purok Proper South, Barangay Taloc sa Bago City, kagab-i, nga nagresulta sa pagkasamad sang tatlo ka mga persona.
Ang imbulbado nga mga salakyan sa insidente amo ang Toyota Vios, Suzuki Carry kag Mitsubishi Fighter Truck Ref Van.
Base sa imbestigasyon sang PNP, padulong sur ang multicab nga ginamaneho sang 29-anyos nga driver. Yara ini sa inner lane bangud tuyo kuntani sini nga magliko pawala.
Apang nabungguan sang nagasunod nga awto ang pang-ulihi nga bahin sang multicab, rason nga nag-swerve ang multicab sa pihak nga lane kun diin naigo ang canter, nga padulong Bacolod City.
Ang awto ginamaneho sang 65-anyos nga lalaki, kag may pasahero ini nga babaye nga 68-anyos.
Samtang, ang canter ginamaneho sang 32-anyos nga lalaki.
Matapos sang bungguanay, nadulaan sang kontrol ang driver sang awto, rason nga natumba ini.
Nakaangkon sang mga pilas ang driver kag pasahero sang awto, pati na ang driver sang multicab.
Gindala ang mga pilason sa Bago City Hospital, samtang boluntaryo naman nga nagsungka ang driver sang canter sa traffic investigator.*