Tatlo na ka mga LGU ang naga abiso sa ila pumuluyo nga likawan anay ang pag bakal kag pagkaon sang aloy kasunod sang gin-report allergic reactions sa mga nag kaon sini.
Bureau of Fisheries and Aquatic Resources ang naga panawagan sa mga vendors nga likawan ang pag baligya sang lub-ok ukon indi na preska nga isda para mapangapinan man ang mga konsumedor.
Padayon man ang pag pangusisa sang BFAR angut sa kaso sang nabaligya nga aloy sa Cadiz City nga nag tuga sang allergic reactions sa mga nag kaon sini.
Suno kay Rene Parreño ang OIC-Regional Director, sa ila inisyal nga pag pangusisa gikan sa Antique ang natungdan nga aloy kag ginbakal sang duha ka mga grupo kag gin-deliver sa nag kalain-lain nga lugar sa Negros Occidental.
Nag random sampling naman ang BFAR sa mga bag-o nga na deliver nga aloy. Ini para mapat-od suno kay Parreño kun ano gid ang nagtuga sang allergic reactions – ang aloy mismo ukon bangud na nalub-ok na ang aloy.
Suno kay Dr Maria Victoria Ibañez ang City Health Officer sang Cadiz, 56 ang nagkadto sa Emergency Clinic kag Cadiz District Hospital bangud sang mga sintoma. Duha ang nagapabilin nga na-admit.
Usisaon pa sang BFAR ang kaso sa Hinigaran kag La Castellana. May tatlo ka nakitaan sang allergic reactions sa Hinigaran kag apat naman sa La Castellana matapos mag kaon sang aloy.
Suno kay Remuel Lajo gikan sa Sipalay City ang nakaon nga aloy sa La Castellana. Ang duha ang naga pabilin under investigation.
Ang sa Hinigaran, padayon pa ang pag pangusisa as of press time.
“Nag pa gwa kami sang amon advisory nga ang aloy as per isda mismo wala siya problema. Pero kun lub-ok na siya, ang advisory naton sa aton pumuluyo, makita man naton, medyo humok na iya unod, ang mata ya indi na klaro, indi na ta magbakal. Pero kun preska man lang siya gina kilaw gani na siya sang aton mananagat. Sa aton vendors man tani mag bulig na sila nga indi na mag baligya sang mga lub-ok na para at least ma protektahan man ang aton pumuluyo sa indi na lab-as nga isda”, suno kay Parreño.*
[sibwp_form id=1]