Naaresto na sang kapulisan ang tatlo ka mga persona nga gina tudlo suspek sa pagpatay sa kay Don Paulo Teves nga utod sang alkalde sang banwa nga si Edgar Teves Jr.
Nasapwan sang Lunes sa basurahan sa Barangay Calayugan sa Valencia ang bangkay ni Teves nga naputos sang habol kag plastic bag. May igo sang bala ang iya nga ulo.
Suno kay Major Roger Quijano, hepe sang Valencia PNP, ang tatlo ka suspek amo ang ulihi nga upod sang biktima antes ini nasapwan patay. Sila amo sanday Tim Moerch, isa ka Danish national kag iya partner nga si Myla Ozoa Cagasan.
Isa pa nga nadakop amo si John Edward Remollo. Suno sa pulis, may nabatian nga lupok sa sulod sang gina rentahan nga balay ni Moerch kun sa diin sila naga tiner.
Personal nga dumot amo ang gina tan-aw nga motibo sa pagpatay kay Teves. Indi pa mahambal sang PNP kun ano ang gin awayan sang biktima kag sang mga suspetsado.
Gin file naman subong nga adlaw ang kaso nga murder batuk sa tatlo ka suspek.