Nagpanindugan ang 79th Infantry Battalion sang Philippine Army nga wala sang kamatuoran ang ginpaguwa nga statement sang Roselyn Jean Pelle Command sang New Peoples Army nga mga asset sang militar kag kapulisan ang tatlo ka mga persona nga ginpamatay sa banwa sang Calatrava.
Suno sa kay Lieutenant Colonel Arnel Calaoagan ang Commanding Officer sang 79th IB, gingamit bilang propaganda sang mga rebelde ang pagpatay sa mga biktima.
Sunod sunod ang pagpatay sang mga rebelde sa tanod nga si Angelo della Cruz, chainsaw operator nga si Welfredo Brasona kag ang mangunguma nga si Edilberto Oreta Sr.
Ginsiling sang NPA nga mga asset sila sang army kag ang isa diri sa ila ang may kaso nga pagpanghimulos sa tatlo niya ka mga kabataan.
Suno sa army ginagamit sang mga rebelde ang pagpatalang sa mga pumuluyo agud makuha liwat ang suporta, sa karon ginatipon na sang militar ang mga impormasyon para makilala kun sanday sino ang mga katapo sang NPA nga nag patay sa tatlo ka mga biktima sa Calatrava para mapasakaan sang kaso.