Patay ang 37-anyos nga mangunguma matapos gintiro sang makapila ka beses samtang naga-inom-inom sa Barangay Asia, banwa sang Hinoba-an sa Negros Occidental, sadtong Sabado, Agosto 30.
Domingo nga adlaw, nadakpan sang kapulisan ang tatlo ka mga suspek, nga amo ang upod sang biktima nga nag-inom-inom.
Nag-gwa sa imbestigasyon sang kapulisan nga naglalisay ang biktima kag mga suspek samtang sila ang naga-inom sang makahulubog nga ilimnon, nga nagresulta sa pagtiro-patay sa biktima.
Ginsiling ni Maj. Jaynick Bermudez, hepe sang Hinoba-an PNP nga nagatinudlu-anay pa ang tatlo ka mga suspek kun sin-o sa ila ang nagpalupok sang pusil.
Suno kay Bermudez, magatindog nga witness ang isa sa mga suspek batuk sa iya mga kaupdanan.
Magapasaka sang kaso nga murder ang pamilya sang biktima.
[sibwp_form id=1]