3 ka mga bangkay sang mga napatay sa Toboso encounter, ipakalkal sang pamilya. Suno sa mga pamilya, ang isa sa mga bangkay sang napatay ang napadala sa lain nga pamilya.
May tatlo na ka pamilya ang nagpangabay sa Commission on Human Rights nga ipakalkal ang bangkay sang ila himata nga napatay sa natabo nga engkwentro sa Barangay Salamanca sa banwa sang Toboso.
Ginsiling ni CHR Commissioner Beda Epres nga nagpangabay ang mga pamilya matapos nagwa ang resulta sang examination sang Forensic Pathologist nga si Raquel Fortun kon sa diin may isa ka bangkay ang ginpadala sa lain nga pamilya.
Sa ila imbestigasyon, sala nga bangkay ang ginpadala sa pamilya ni Errol Wendel, katapo sang Unyon ng mga Mangagawa sa Agrikuktura nga nalakip sa Toboso 19.
Bangud sini, nag-request na ang pamilya ni Errol nga ipa exhume ang iya bangkay agud ila ma-identify kun himata gid man nila ini. Kasubong sini nag request man sang exhumation ang pamilya ni Labskie Enustacion, nga taga Sitio Tinabawan, Barangay Bug-ang Toboso kag ni Joros Caramihan nga taga Don Salvador Benedicto.
Sa karun ginahulat na sang CHR ang clearance gikan sa Toboso Municipal Health Office agud mapatuman nila ang exhumation nga ginapangabay sang tatlo ka pamilya.
Kon tigayon na nga makalkal ang mga bangkay, magapadulong sa probinsya ang duha ma duktor sang CHR kag tatlo sini ka imbestigador agud matumod kon eksakto ang pag identify sang mga militar sa mga bangkay.
Dugang pa ni Epres, yara na sa 50 percent ang ila gina patigayon nga fact-finding sa encounter site.
Luyag nila nga ma-interview ang mga residente sa lugar agud matumod ang kamautoran sa likod sang encounter kag kon sibilyan gid man ang anum sa mga casualties nga ginapanindugan sang mga human rights advocates kag groups.
Nagapanidugan ang Armed Forces of the Philippines nga armado ang tanan nga mga napatay sa engkwentro sa ginpatigayon man nga press conference kaina sang aga. Dugang pa sang army, high powered firearms pa ang bitbit sang mga napatay. Ang mga rebelde suno sa ila ang may paglapas man sa International Humanitarian Law bangud may mga upod sila nga mga menor de edad.*
[sibwp_form id=1]