Gintinguhaan pa sang mga rescuers nga i-revive ang 20-anyos nga lalaki nga naligo kag nalumos sa Pilio-Piliohan River sa Barangay Inapoy, Kabankalan City, pasado las 10 sang aga sadtong Domingo de Paskwa.
Gindeklarar nga dead on arrival ang soltero sa ospital sa Kabankalan City.
Nag-gwa sa imbestigasyon nga nag-outing upod sa iya pamilya ang biktima. Naglangoy ang lalaki sa madalom nga bahin sang suba kun diin siya nalumos.
Sa amo man nga adlaw, isa ka 7 ka tuig nga lalaki nga taga Victorias City ang nalumos sa Malogo River, Hacienda Banilad sa Brgy. Nanca sa banwa sang EB Magalona, mga pasado las 11 sang aga.
Nagpaligo sa suba ang biktima upod ang iya pamilya. Wala madeparahan kag nasapwan na lamang sang iya tiyo nga naga-utaw-utaw na ang biktima.
Gin-rescue ang bata kag gindala sa Silay Hospital apang siya ang napatay.
Samtang, nagapaligo sa Bago River nga sakop sang Purok Mahogany sa Brgy. Bunga sa banwa sang Don Salvador Benedicto ang lima ka tuig nga babaye upod ang iya pamilya kag abyan sang natalupangdan sang iya amay nga nadula ang bata, mga pasado las 11 sang aga, sang Sabado de Gloria.
Ginpangita ang bata kag nakit-an nga yara na ini sa idalum sang tubig. Gindala ang biktima sa DSB Municipal Health Unit apang ginsaylo siya sa ospital sa Bacolod tungod unresponsive ang iya vital signs, kag didto na nagtaliwan ang biktima.*
[sibwp_form id=1]