Bente nuebe tanan ka mga persona sa Bacolod City ang gin isyuhan sang Task Force Disiplina sang citation ticket sa bulan sang Marso.
Kada adlaw nagalibot sa mga pampubliko nga lugar ang mga katapo sang task force para magsaway sa mga wala nagasunod sang minimum health protocols.
Suno sa pamuno sang task force nga si Wilfredo Geolingo, ila nga gina isyuhan sang citation ticket ang mga wala sang suksuk nga face mask ukon face shield kag ila naman nga ginasaway kag gina akigan ang mga may yara sang face mask kag face shield pero indi eksakto ang pagsuksuk sini.
Problema man suno kay Geolingo ang indi pagsunod sa physical distancing bangud madamo sang nagakalipat.
Base sa ordinansa, sarang nga magbayad sang multa ukon mag community service sa barangay ang mga ma isyuhan sang citation ticket.
Nagapahanumdum ang task force sa publiko nga estriktuhon ang pagsunod sa minimum health protocols ilabi na karon nga nagasaka na naman ang mga kaso sang covid-19 sa siudad.