Department of Agriculture Regional Office ang naga pakig angut karon sa tagsa ka mga banwa kag siudad sa Negros Occidental para sa random sampling kasunod sang kaso sang pagkamatay sang masobra na sa 2,400 ka mga baboy sa probinsya.
Suno kay Albert Barrogo ang Regional Executive Director sang Department of Agriculture, ang katapo sang regional office upod sa personnel sang Provincial Veterinary Office ang maga patigayon sang random sampling. Ang testing suno sa iya ang patigayunon sa laboratory sang probinsya kasubong man sa region.
Kun mapadala ang sample bwas nga adlaw, sa Lunes ginapaabot ang resulta.
Ang bilog nga 27 ka sample nga ginpadala sang probinsya damlag pa sa DA ang nag negatibo sa African Swine Fever. Suno kay Barrogo ang natungdan nga samples ang gikan sa banwa sang San Enrique.
Nag positibo sa hog cholera ang mga baboy nga ginreport napatay sa mga banwa kag siudad sa Negros Occidental suno sa PVO, nga nagdangat na sa 2,421.
Ang Bago City ang may pinaka madamo na record napatay – 755. Mga sulusobra sa 3 percent ini sa bilog nga populasyon sang baboy sa siudad suno kay Mayor Nicholas Yulo.
Suno kay Yulo isa sa gina patuman nila karon amo nga ang mga barangay nga apektado sang hog cholera, sa barangay na man lamang mismo maka baligya.
“We isolate ang sale of hogs in the affected area strictly inside that zone. There’s a zone indi mo ma pa gwa ang imo baboy, dira ka lang maka baligya sang imo baboy. Within that area. That is strictly being implemented since close to three weeks ago”, suno kay Yulo.
Kahapon nag pa gwa na si Governor Eugenio Jose Lacson sang Executive Order nga naga tuga sang Incident Management Team. Tuyo sini ang pag pahamtang sang mga tikang kontra sa animal biosecurity threat kasubong man pagpabaskog sang pag patrolya sa mga seaport, transportation terminals kag borders para malikawan ang paglapta sang swine disease.