May P41 na nga per kilo sang bugas sa Libertad Public Market. Ini matapos man nga nagsunod ang pila ka mga rice retailers sa ginapatuman nga price ceiling pinaagi man sa bulig sang local government unit nga amo ang nag giya para makabaligya sila sang mas barato nga bugas sa bumalakal.
Pero isa pa lang sa 159 ka mga registered rice retailers sa Bacolod ang nakabaton sang P15,000 nga financial assistance halin sa Department of Social Welfare and Development kag Department of Trade and Industry.
36 naman ka rice retailers ang natagaan sang ayuda sa pila ka mga banwa kag siudad sa probinsya.
Suno kay City Administrator, Atty. Pacifico Maghari, III, natalana nga liwat nga mag release sang ayuda ang ahensya para sa kapin 100 rice retailers kag 27 diri ang halin sa Bacolod.
Ginatan-aw naman ni Mayor Albee Benitez nga sa padayon nga pagnubo sang presyo sang bugas kadungan sang pagsulod sang local supply sang bugas mahimo nga sa madasun nga sinemana maga stabilize na ang presyo kag indi na kinahanglan ang price ceiling sa produkto.