Temporaryo anay nga ginsaylo sa iban nga police station ang 269 ka mga police personnel nga may mga himata nga nagapapili sa Barangay kag Sangguniang Kabataan elections.
Kabahin sa gin-transfer si Silay City PNP Chief Police Lieutenant Mark Anthony Darroca.
Suno kay Negros Occidental Police Provincial Office Spokesperson Police Captain Judesses Catalogo, ang pagsaylo sa mga police personnel ang kabahin sa pagsunod sa guidelines sang Commission on Elections agud mapasiguro ang integridad sang piniliay kag mapabilin nga non-partisan ang kapulisan.
Ang mga ginbalhin nga personnel ang ibalik man sa ila ginhalinan nga police station makaligad ang 45 days. Ginpasalig naman ni NOCPPO Director Police Colonel Leo Pamittan nga may nagakaigo nga pwersa ang kapulisan para sa pinili-ay. Pero sarang man ini madugangan kun ginakinahanglan.
Ginalauman sang pamunuan sang NOCPPO nga magpabilin man nga matawhay ang pinili-ay ilabi na sa tion nga magsugod na ang campaign period.