8,000 ka tray ukon 240,000 ka bilog nga itlog ukon table eggs ang na-intercept sang otoridad sa Bredco Port sini lamang.
Kasunod sang nabaton nga report angut sa undocumented livestock product, mga personnel sang Bureau of Animal Industry Veterinary Quarantine Service 6, Department of Agriculture, kag ang Veterinary Office sang Negros Occidental kag Bacolod nag dakup sang 8,000 ka tray sang table eggs sang Lunes.
Ini ang gilayon nga gin-dispose sa tinutuyo nga mapangapinan ang poultry kag gamefowl industry sang probinsya.
Ang table eggs gikan sa mga lugar nga may kaso sang bird flu ang isa sa gina dumilian nga mag sulod sa Negros Occidental kag Bacolod bilang tikang nga mapangapinan ang lugar kontra sa bird flu.
Samtang, sa bulan sang Enero, naglab-ot sa 293,830 pesos, ang balor sang poultry kag poultry products ang nadakup gikan sa mga puerto, airport kag iban pa nga entry points sa probinsya.
382,111 pesos naman ang balor sang pork kag pork meat products ang na kumpiska angut sa gina patuman nga ban para mapangapinan ang probinsya kontra African Swine Fever.