Dead on arrival sa Governor Valeriano M. Gatuslao Memorial Hospital ang 26-anyos nga biktima, samtang nagapaayo naman ang duha niya ka mga kaupdanan nga naga-edad 43 kag 18 anyos.
Natabo ang insidente sa Purok 1, Barangay Nabali-an sa siudad sang Himamaylan, Negros Occidental, Huwebes nga adlaw.
Ginsiling ni Police Lt. Peter Genovea, deputy chief sang Himamaylan PNP, ginlihog sang barangay kapitan sang Nabali-an ang tatlo ka mga biktima nga gabuton kag isaylo ang steel post agud mabutangan sang solar lights. Apang, wala nila madeparahan nga may kable nga utod sa ibabaw sang poste kag nagasablay ini sa main wire sang NOCECO, rason nga sila ang nakuryente.
Dugang pa ni Genovea, may kabaskugon nga 13,200 volts ang main wire sang NOCECO, base sa panaysayon sang staff sang electric cooperative.
Ginsabat naman sang kapitan ang tanan nga hospital kag burial expenses sang mga biktima.
Sang nagligad nga tuig, may yara man sang mag-amay nga nakuryente kag napatay sa nasambit nga lugar.