Sa 23 ka mga barangay nga gintagaan deadline sang Biyernes, ang Barangay 34 pa lang ang naka submit sang ila liquidation report para sa financial assistance gikan sa siudad nga gingamit sa Masskara Festival sang nagligad nga tuig.
Para kay Councilor Jason Villarosa, pamuno sang Committee on Tourism sang konseho, obligasyon sang barangay nga magsubmit sang financial statement sa P200,000 nga financial assistance para sa street dancing kag arena competition kag P150,000 sa electric MassKara competition.
Gani para sa iya, magluwas nga indi na maka entra sa Masskara Festival 2023 competition ang mga barangay nga wala pa maka liquidate, indi naman dapat maghatag sang financial assistance sa ila ang siudad mentras nga indi sila maka liquidate sa pondo nga ginhatag sa ila.
Nagmando na si Mayor Albee Benitez nga kun indi maka liquidate ang mga barangay nga natagaan sang financial assistance indi naman sila tugutan nga makapasakop sa natalana nga kumpetisyon sa Masskara Festival 2023.