Ginbawian sang kabuhi ang isa ka 21-anyos nga rider matapos magbungguanay ang iya ginamaneho nga motorsiklo kag isa ka pickup sa atubang sang isa ka softdrink company sa Mansilingan-Murcia Road, Barangay Mansilingan sa Bacolod, kagab-i.
Padulong sa Bacolod ang biktima samtang padulong Murcia naman ang pickup truck.
Base sa imbestigasyon sang pulis, may kadasigon ang pagpadalagan sang motorsiklo sang biktima.
Ginsiling ni Police Major Elmer Bonilla, pamuno sang Bacolod Traffic Enforcement Unit, nagapangita pa sila sa karon sang CCTV footages agud mahibaluan ang mga rason kung ngaa nagbungguanay ang motorsiklo kag pickup.
Makit-an sa lugar sang insidente ang natumba nga motorsiklo sang biktima kag ang nagtabog niya nga nutshell-type nga helmet.
May gamay nga kurbada sa area kag masami nga ginaluntaran sang traffic incident ang lugar, gani nagpanugyan si Bonilla nga magsuksok sang full-faced nga helmet kag maghinay-hinay sa pagmaneho.
Gindala naman sa Police Station 7 ang 29-anyos nga driver sang pickup kag nakadepende sa pamilya kung sila ang magapasaka sang kaso batok sa iya.
