Shadow

200,000 ka mga Bacolodnon target sang Benitez administration nga matagaan sang health card

Nagpadulong sa ABB Bacolod Office si Helen Catolico kag ang pakaisa sang iya misis nga si Marylyn Tenorio para magpasimpalad kun maka pangayo sang medical assistance.

Abril 23 nabungguan sang salakyan ang bana ni Helen nga si Leon sa Fortune Town samtang naga parking sa higad sang dalan.

Gin tahi kag gin staple ang ilo ni Leo may mga samad ang nagkalain lain nga parte sang iya lawas.

Ang naka bunggo naka hatag na sang masobra sa otsenta mil pesos sa ila kag wala na sang may mahatag pa.

Ang tanan nila nga nabaton nga kwarta naubos sa ospital, subong wala na sila sang may inugbakal sang bulong.

Bangud wala pa mag ayo wala man income ang mister ni Helen. Indi pa man abe magiho ang iya nga mga bukton. May gina pa eskwela pa sila nga manug sulod na sa kolehiyo.

Kun may health card lang sila kun tani, mahimo wala nagkadto tanan nga kwarta sa ospital. Kun tani may ipang bakal pa sila sang bulong.

Isa lamang sila sa mga naga pila kada adlaw para mangayo sang medical assistance sa talatapan ni mayor elect Albee Benitez.

Kahapon gin sapol na ni Benitez sanday Dr. Carmela Gensoli ang City Health Officer sang Bacolod kag Dr. Mary Ann Maestral ang pamuno sang Teresita Lopez Jalandoni Provincial Hospital para ma plantsa na ang plano nga BACCHP ukon ang Bacolod City Comprehensive Health Program ukon ang paghatag sang health cards sa mga pumuluyo sang Bacolod nga magamit sa public kag private hospitals.

Kabahin ini sa mga gin promisa ni Benitez sa mga Bacolodnon sa iya nga pagkampanya. Luyag niya isa ini sa masuguran gilayon sa iya pagpungko bilang alkalde.

Target ni Benitez nga maka hatag sang health cards sa may kapin sa dos siyentos mil ka mga bacolodnon, indigent man ukon indi.

Si helen tigayon nga naga process sang medical assistance. Mahulat na lang siya sang text message kun ma release na ang bulig pinansyal.

Ang pakaisa sang iya mister nga si Marylyn, magahulat man nga magtupa na ang health card kay may gina batyag man siya kag luyag niya nga maka pa check up sa ospital.

Secured By miniOrangeSecured By miniOrange