May masobra na sa 5,000 ka households ukon masobra sa 20,000 ka indibidual ang apektado sang potable water shortage sa Himamaylan City.
Sa report sang City Disaster Risk Reduction and Management Division sang Himamaylan City nagsaka na sa onse ka ma barangay ang apektado sang potable water shortage.
Sa March 20 nga report sini, 5,282 ka household ukon 20,223 ka individuals ang apektado.
Suno kay Joefil Sombilon, ang Research and Planning Section Chief sang CDRRMO – Himamaylan sa mga apektado nga barangay ang Cabadiangan kag Mahalang ang labing apektado.
Ang mga bubon sa lugar suno sa iya nagadalom na sang 80 to 90 feet pero wala sa gihapon sang tubig.
Nagpatuman na sila sang rationing sang tubig, gingamit naman ang water filtration unit sang probinsya kag nag preposition na sang mga water tanks.
May 13 naman ka mga barangay ang nag-report sang kahalitan sa humay nga nagdangat sa masobra 12 million pesos. Padayon ang pagpanagtag sang vegetable seeds para mabuligan ang 381 ka mga mangunguma nga apektado.
Samtang, sa La Carlota City naman, wala sang report nga water shortage pero suno kay Mayor Rex Jalando-on naga batyag man sang reduction ila nga water sources bangud sang kainiton. Nalikawan ang dalagko nga kahalitan sa pananum suno sa iya kag na handaan na sang mangunguma ang epekto sang El Nino. Tigaylo nga magtanom sang kinaandan nila, nagpaiway sila kag nagtanom sang mga drought resistant crops.