Nasunog ang 20 ka mga pamalay nga himo sa light materials matapos mag-ibwal ang kalayo sa Purok Tahong, Barangay 2 sa Bacolod City, pasado las 2 kaina sang kaagahon.
Suno kay Fire Officer 2 Rolin Paulan, chief investigator sang Bacolod City Fire Station, nagsugod ang kalayo sa balay ni Marcelino Pitogo nga gina-rentahan sang isa ka ginkilala kay Gerald Nessia.
Madasig nga naglapta ang kalayo sa mga kaiping nga balay bangud himo ang mga ini sa light materials.
Base sa record sang Bacolod BFP, 35 ka mga indibidwal ukon 20 ka mga pamilya ang apektado bangud sang sunog.
Ginabulubanta P125,000 ang kahalitan sang sunog.
Suno sa panaysayon sang mga kaingod balay kag mga saksi, nagsugod ang kalayo sa nakasindi nga kandila bangud nga wala sang kuryente ang balay nga gina-istaran ni Gerald.
Apang wala man ginadula sang Bacolod BFP nga may angut sa kuryente ang natabo nga sunog.
“Prior sang incident, ang ini nga balay nga gina-istaran ni Gerald Nessia, wala sang kuryente so gagamit sila kandila ukon cellphone kag pin light sang lighter. So one of the probability nga lighted candle ang cause. But at the same time, wala man namon ginadula ang angle nga kay since may mga info kami nga nabaton nga sa dira nga area from the service entrance sang mga kuryente, nagasulod na sa electrical pole apang ang wire nagalabay sa atop and sometimes nagabunggo-bunggo sa metal roofing nga dako ang potensyal nga magtuga sang kalayo.”, suno kay Paulan.*
[sibwp_form id=1]