Wasak ang glass wall sang back entrance sang Gaisano City Mall sa Barangay Singcang-Airport sa siudad sang Bacolod matapos nga magbutyog ang isa ka Jetour X50 nga salakyan kag nabunggo diri sang Hwebes sang gab-i.
I-display kuntani ang salakyan sa sulod sang mall. Empleyado man sang car company ang naga dala sini.
Sa imbestigasyon sang Police Station 8, nag guot ang salakyan sa rampahan pasulod sa mall gani gin lasak pa gid sang driver ang gasolinador kag nagbutyog ang salakyan rekta na sa glass wall.
May minor injuries ang driver kag isa pa gid ka empleyado sang car company nga naga guide sa iya sa pagpasulod sang salakyan sa mall.