Ginbawian sang kabuhi ang duha ka mga babaye sa nagluntad nga sunog sa Tirad Pass Street, Lopez Subdivision sa Barangay 6, Victorias City Lunes sang kaagahon.
Ang 58-anyos nga biktima ang na-cardiac arrest samtang ang 35-anyos nga babaye ang na-trap sa sulod sang C.R. sang iya balay.
Sa imbestigasyon sang Victorias City Fire Station, nagsugod ang kalayo sa kusina sang balay sang 35-anyos nga napatay.
Wala masunog ang balay sang 58 anyos pero sa pensar nga nadalahig ang iya balay, na cardiac arrest. Ang 35 anyos naman nasapwan na lang sa sulod sang iya nga banyo.
Ginsiling ni Fire Officer 1 Jon Jeff Basa, chief sang intelligence and investigation section sang Bureau of Fire Protection sa Victorias City, nagkalasunog ang tatlo ka mga balay, nga himo sa light materials.
Sa inisyal nga imbestigasyon, nagsugod sa electrical wiring ang kalayo.
Suno kay Basa, ila na ginpadala sa Fire Laboratory Service ang physical evidence nga nakuha sa fire scene agud mapat-ud gid ang gintunaan sang sunog.
Naglawig ang sunog sang kapin isa ka oras kag gindeklarar nga fire out mga la una singkwenta’y otso sang kaagahon.
Samtang, duha ang pilason sa sunog nga nagluntad sa Purok Pine Tree, Barangay Bata sa Bacolod City, Domingo sang kaagahon.
Nakaangkon sang mga paso ang mag-asawa nga naga-istar sa nasunog nga balay.