Patay ang motorcycle rider nga si Joseph Ordeneza matapos mag suhot kagab-i ang iya gina dala nga motorsiklo sa isa ka firetruck sa Lacson Extension sa bahin sang Barangay Singcang-Airport.
Sa imbestigasyon sang Police Station 8, naga biyahe sa separado nga lane ang firetruck kag motor sang hinali na lang madanlog sa dalan ang motorsiklo ni Ordeneza kag nag rekta ini suhot sa firetruck.
Dead on the spot si Ordeneza. Gin detain naman sa Police Station ang driver sang firetruck.
Samtang, patay man ang 34 anyos nga si Jose Ronnie Ruel Junior matapos maka bunggo Martes sang gab-i sa gutter ang iya gina dala nga tricycle sa bahin sang Granada-Alangilan Road sa Barangay Granada.
Suno kay Police Lieutenant Melchor Tolentino, hepe sang Police Station 5, papauli na kun tani sa iya puluy-an si Ruel sa Barangay Concepcion sa Talisay sang siya ang maka bunggo sa conrete gutter sa kilid sang dalan.
Posible suno kay Tolentino nga napiyungan si Ruel bangud sa nag lapaw na siya sa pihak nga lane kag sa gutter sa pihak nga lane siya naka bunggo nga nag resulta sang iya pagkatumba sa semento.
Gindala pa sa ospital ang tricycle driver pero siya ang gindekalara nga dead on arrival.