Probinsya sang Negros Occidental ang may yara sang duha ka suspected human rabies death sini nga 2025.
Suno kay Dr Girlie Pinongan, ang Provincial Health Officer, humalin Enero sini nga 2025, tubtob karon, may duha ka persona nga napatay bangud sang suspected rabies.
Ang una, isa ka apat ka tuig nga bata nga lalaki gikan sa Don Salvador Benedicto nga ginkagat sang ido.
Ang pinaka bag-o nga kaso sang weekend lamang. Isa ka 72 anyos nga lolo gikan sa banwa sang Hinoba-an nga kuntani dal-on pa sa Corazon Locsin Montelibano Memorial Regional Hospital, pero suno kay Pinongan wala na mahingagaw pa kag napatay ang pasyente.
Suno sa PHO ang 72 anyos ginkagat sang ido tatlo ka tuig ang nakaligad kag may history man ini sang pagkaon sang karne sang ido.
Padayon pa ang pag pangusisa man sang PHO sa mga natungdan nga kaso. Sa report sang Department of Health, sa tuig 2024 may 426 ka kaso sang rabies ang na-record sini sa bilog nga pungsod. Kag tanan nagkalamatay, pamatuod nga ang rabies makatalagam suno sa DOH.
“May human death nga suspect kag halin sa Hinoba-an. Sang weekend. Supposedly, i-refer siya sa Corazon Locsin, but wala na siya nakalab-ot sa Corazon Locsin. Wala man gani nakalab-ot 24 hours I think napatay ang patient”, suno kay Pinongan.