Duha ka persona ang kumpirmado patay samtang lima ang pilason sa nagluntad nga pag ka bunggo sang salakyan sa Sto. Rosario, Barangay Guimbalaon sa Silay City, Domingo sang hapon.
Makita sa sini nga CCTV video ni kagawad Noel Denosta nga ginpadala sa K5 news FM ang pagbunggo sang van sa dump truck kag paglabog sang mga pasahero sa dalan.
Nagwa sa traffic investigation sang Silay City PNP, sakay sa Toyota Lite Ace ang mga biktima gikan Sitio Lantawan padulong sa proper sang Silay, sang naglapaw ang salakyan sa pihak nga lane kag nadulaan sang control ang 31-anyos nga driver. Nakabunggo ang van sa naga park nga Isuzu Dump Truck sa higad sang dalan.
Nagkala-ula ang mga pasahero nga nakasakay sa likod sang van. Nagtupa sila sa sementado nga dalan, rason sang ila pagkapilas.
Gindala sa ospital ang mga pilason nga pasahero apang duha sa ila ang ginbawian sang kabuhi.
Samtang, gin-detain ang driver sang Toyota Lite Ace sa Silay Police Station.
Suno sa pulis, na-obserbaran nga yara sa impluwensya sang makahulubog nga ilimnon ang driver.
Sang Hunyo 27, 2025, may nagluntad man nga pagkatumba sang isa ka truck sa daligdigon nga parte sang dalan sa Barangay Guimbala-on kung diin pito ang nagtaliwan kag 17 ang pilason.