Tatlo tubtob apat ka persona gina tan-aw sang PNP nga dugang nga persons of interest sa tiruhanay sang duha ka pamilya sa Victorias.
Duha ka persona ang napatay samtang duha naman ang pilason matapos mag luntad ang pagtiruhanay bangud sang away sang duha ka pamilya sa Barangay 10 sa Victorias City sang Sabado.
Ang napatay amo sanday Regie Loquinario kag Jony Solatorio. Pilason naman ang menor de edad nga utod ni Solatorio kag himata ni Loquinario nga si Ryan Certicio nga amo gina tudlo nga suspek.
Suno sa hepe sang Victorias PNP nga si Lt Col Eduardo Corpuz, naga ininom lang ang mag utod nga Solatorio kag mag himata nga Loquinario kag Certicio upod sang iban pa nga mga persona sang mag pabatianay ang duha ka grupo bangud sang away sa trabaho kabangdanan nga nag puli sanday Certicio kag nag kuha armas.
Nag lab utanay sa dalan suno kay Corpuz ang duha ka grupo kag didto na nag bayluhanay sang lupok nga gin tunaan sang kamatayon ni Loquinario kag magulang nga Solatorio.
Detained karon si Certicio nga gina tudlo isa sa una nga nag palupok. May tatlo pa tubtob apat ka persona nga gina tan-aw karon ang pnp nga imbolbado man sa tiruhanay.
Samtang sang Dominggo patay man ang 27 anyos nga si Raymund Pasigado matapos siya tiruhon samtang yara lang ini sa sulod sang iya puluy-an sa Barangay Sagasa sa siudad sang Bago.
Ang biktima ang nag tinguha pa amg palagyo suno sa pulis pero siya ang gin lagas kag liwat gin tiro sang suspek nga si Sunny Gamoyao nga may tatlo ka iban pa nga upod.
Gina hibalo pa sang pnp kun ano ang motibo sa pag patay sa kay Pasigado.