Sa banwa sang Calatrava, duha patay, isa pilason sang mabunggo ang motor sa dump truck.
Patay sanday Reymund Cogonon kag Pedro Sabroso samtang pilason naman si Randel Bornea mabunggo ang ila ginasakyan nga motorsiklo sa dump truck sa National Road, Barangay Lemery, banwa sang Calatrava,Sabado sang hapon.
Base sa spot report sang Calatrava PNP, gina-usoy sang tatlo ka biktima nga sakay sang motorsiklo ang dalan gikan sa Calatrava padulong sa Toboso, samtang gina-usoy naman sang dump truck ang dalan gikan sa Sitio Dao, Barangay Lemery, Calatrava padulong sa Calatrava Proper.
Paglab-ot sa kurbada nga bahin sang dalan, hinali na lamang nakabunggo ang motorsiklo sa goma sa likod sang dump truck.
Nag angkon sang malubha nga pilas ang mga sakay sa motorsiklo nga nagresulta sa kamatayon sang duha.
Gilayon naman gindala ang mga biktima sa Calatrava Municipal Hospital apang ang rider gindeklarar nga dead on arrival kag sa ospital na napatay si Sabroso.
Padayon nga gina bulong sa ospital si Bornea.
Padayon pa ang imbestigasyon sang PNP sa sini nga kaso.