Sa pihak sang halit sang El Nino sa tinalikdan nga crop year, ginakalipay ni Sugar Regulatory Administrator Pablo Luis Azcona nga sarang maglab-ot sa 2 million metric tons ang sugar production sang pungsod sini nga crop year.
Mas mataas ini sa ila projected nga 1.8 million metric tons nga produksyon sa pihak sang gin-atubang nga pagpanghangkat sang sugar industry.
Sa pagsaulog sang 39th Founding Anniversay sang SRA, ginkabig ni Azcona nga positive year ang nagligad nga crop year kag para sa iya nangin instrumental diri ang intensive research para mabuligan ang mga sugar farmers kag ang pag-idog sang harvest kag milling schedule sa Agosto tubtob Oktubre sang nagligad nga tuig.
Gindugang niya nga pinaagi sa research napasangkad ang production paagi sa mga high-yielding cane varieties.
Nagligad lang man nga bulan sang ginpang-atake sang peste nga red-striped soft scale insects ukon RSSI ang masobra 500 hectares nga katubuhan sa Northern Negros.
Pero gilayon nga nag-allocate sang P10M nga pondo ang Department of Agriculture para sa insecticides sa tuyo nga masalbar ang mga pananom nga natalana sa masunod nga crop year.