Pilason ang duha ka mga PNP intelligence operatives, pati na ang nadakpan nila nga drug personality matapos mabungguan sang awto samtang nagapatigayon sang buy-bust operation sa higad sang dalan sa atubang sang Taala Farm sa Handumanan Access Road, sakup sang Barangay Mansilingan sa Bacolod City.
Gindala sa ospital ang 35-anyos nga pulis, nga may ranggo nga Police Staff Sergeant; ang iya upod nga may ranggo nga Corporal; kag ang 23-anyos nga subject sang buy-bust.
Out patient ang Corporal kag ang subject sang buy-bust, apang ang Police Staff Sergeant ang padayon nga ginabulong sa ospital.
Huwebes sang gab-i, nakatapos lang gid transaction ang police poseur-buyer sa ila subject kag sila ang magaplastar na kuntani para sa inventory sang gulpi lang sila ginbungguan sang Honda City nga awto.
Suno sa driver sang awto, napiyungan siya kag nagrekta sa nahamtangan sang mga pulis.
Bangud sang impact, natumba ang isa ka tricycle sa lugar kag nawasak ang atop sini.
Matapos sang insidente, nagpadayon sa pag-inventory sang narekober nga illegal drugs ang kapulisan nga nakaluwas.
Wala naman sang pilas ang driver sang awto nga karon detained sa Station 7 kag siya ang pasakaan sang kaso nga reckless imprudence resulting in physical injuries and damage to properties.
Samtang, kaso nga pagsupak sa Republic Act 9165 ukon Comprehensive Dangerous Drugs Act of 2002 ang iga-file sa subject sang buy-bust nga nakuhaan sang pito ka sachets sang ginasuspetsuhan shabu.