Ginkilala ang mga napatay nga NPA nga sanday Johnhilll Sarsa aka Mark, residente sang Brgy. Planas, Guihulngan City kag Dalmacio Dela Torre aka Delmar, residente naman sang Brgy. Trinidad, Guilhulngan City, Negros Oriental.
Si Sarsa ang Political Officer sang Sandatahang Yunit Pampropaganda Platoon Lenovo, Central Negros Front 1 samtang si Dalmacio ang miembro sang CN1, KR-NCBS.
Suno sa Philippine Army, nakabaton sang impormasyon ang 62nd Infantry Battalion sa gin-alegar pagpamahog kag pagpangilkil sang mga rebelde sa Sitio Upper Binataan, Barangay Quintin Remo, Moises Padilla kahapon sang aga rason sang pagpatigayon sang pursuit combat operations sang ila ma-engkwentro ang kapin 15 ka mga katapo sang NPA.
Naglawig sang 40 minutos ang baylohanay sang tiro nga nag-resulta sa kamatayon sang duha ka mga rebelde. Na-recover sa encounter site ang duha ka M16 rifle, isa ka M203, isa ka AK47, isa ka M14, isa ka magnum .357 revolver , duha ka rifle grenade kag mga dokumento kag personal nga mga butang.
Gin-turnover na sang 62nd IB ang bangkay sang nagkalamatay sa Moises Padilla Police Station.